Июлин 19-пи йигъан Дербент шагьриъ Лезги театрин залиъ ихь табасаран драмайин театрин коллективди Казань шагьриан вуйи режиссер Дамир Самерхановди сягьнайиин диву «ЙикIуз ккадарза» кIуру спектакль Мягьячгъалайиан дуфнайи комиссияйин улихь улупну. Му спектаклиъ ихь театрин ужударсдар актерар иштирак гъахьну.

     Спектакль Татарстан республикайиан вуйи Т. Миннуллиндин «Альдермешдиан вуйи Альмандар» кIуру пьесайин бинайиин дивуб ву. Спектаклин художник Ленар Гильмутдинов, пьеса табасаран чIалназ илтIибкIур ихь театрин литературайинна драмайин пайнан руководитель Аьбдурягьим Аьбдурягьманов ву. 

     Автори «пашман комедияси» улупнайи спектаклиъ кIулин игитри, фукьан читинвалар алахьнушра, яшамиш хьуз юкIв хъади, багахьлуйирихьна, дустарихьна инсан саягъ илтIикIну ккунибдин гъаврикк ккаъра. Гьацира, 101 йис яш дубхьнайи Аьлидарин уьмур, дугъан жигьилди гъубзу рюгьра гьарсариз нумуна вуйибдинра гъаври шулу. Спектаклин «сир» вари ачмиш апIуз ккундарзуз, хъа думу гьарсариз дябкъну ккуниб къайд апIураза. 

     Казань шагьриз кьяляхъ хътакайиз, узу Дамир Самерхановдихъди гюрюшмишра гъахьунза ва ихь театрин актерарихъди сабхилди вуйи ляхин фици кIули гъубшнуш, гьерхунза. 

     «Узу Дагъустандиз сабпи ражари гъафунза. Республикайин театрарихъди таниш апIру мялуматдихъди узу Москва шагьриъ гъубшу театрарин вакиларин Союздин серенжемдиъ, республи- кайин театрарин ишчйирин Союздин председатель Айгум Айгумовдикан гъеебхьунзуз. Узу мина Табасаран театрин руководствойин теклифниинди гъафунза. Спектакль ужуб хьпан бадали, пьеса ктабгъ- руган гизаф фикир гъапIунза. Театрин актерар вари ужуб таж- руба айи, жюрбежюр режиссе- рарихъди ляхин апIури вердиш духьнайидар ву», – гъапну йиз сюгьбатчийи. 

     «Театрин директор Аьлимурад Асланбеговичди коллективдиз шаирар, мяълийирин устадар, яратмиш'валин цIюмгъял кайи инсанар уч дапIна. Думу учвра зигьимлу, ужур руководитель ву. ЦIиб вахтналан театрикан табасаран халкьдин культурайин центр хьибди. Театрин артистари тамашичйирихъди сигъ аьлакьйир уьрхюра, дурарихъди сюгьбатар гъахура. Жанбулат Зайналовичра артистарин гъавриъ шлу, зигьимлу режиссер ву. Му спектакль табасаран халкьди ужуди кьабул апIур кIури умудлу вуза», – натижа гъивнийи Д. М. Самерхановди. 

     Узу гьацира му спектаклиъ иштирак гъахьи артист Ризван Аскеровдин Дагъ. Огни шагьрин 4-пи нумрайин мектебдин 4-пи классдиъ урхурайи бай Сяид Аскеровдихъдира таниш гъахьунза. 

     «Спектаклиъ иштирак гъахьиган, узу аьхю инсанси гьиргъуз хъюгъюнзуз. Узуз табасаран чIал аьгъязуз, бабан чIалнан дарсариъ гьарган «5» гъадабгъури шулза. Адашдин пишера кьабулди вузуз. Аьхю гъахьиган узканра театрин артист хьуб мумкин ву», – кIубандиси йиз суалариз жавабар тувнийи Сяидри.

     Театриъ цIийи спектакль дивбакан узуз табасаран театрин директор Аьлимурад Аьлимурадовдира ктибтнийи: «Учу спектакль диву пьесайин автор Туфан Миннуллин совет вахтарин машгьур драматурга- рикан сар ву. Ва дугъан пьеса сягьнайиина адабгъуб режис- серин, иллагьки – жигьил режиссерин саб хъуркьувалра ву. Ихь театрин сягьнайиин Татарстандиан гъафи жигьил режиссери цIийиди дивнайи спектаклиз кьимат, икибаштIан, тамашичйири тувиди. Хъа йиз фикриан, режиссерин ва актерарин ляхнин натижа харжиб гъабхьундар. 

     Сабсана ляхникан дупну ккунду. Му спектакль ихь теа- триъ «Сабвуйи Урусат» партияйин «БицIи ватандин культура» кIуру федералин партияйин проект уьмриз кечирмиш апIури дивнайиб ву. 2017-пи йислан мина гьадму проектдиинди ихь театриз спектаклар дивуз кюмек гъюра. Узу ихь республикайин культурайин министерствойиз, дициб кюмек учуз туврайивализ, аьхю чухсагъулра кIураза…» 

     Сентябрь вазли театрин коллективди чан тамашичйириз «ЙикIуз ккадарза» кIуру спектакль улупиди. Ккилигурхьа!

Газета «Зори Табасарана» - № 30 от 26-июля 2019 г. Статья «Ц1ийи спектиаклиз ккилигурхьа»). Автор – Ш. Керимова. Ссылка – https://zoritabasarana.ru/images/ARCHIV/2019/30.pdf